20ine serrgêra Amaraye: Wa embazê Mahsumî fek rayîrê ci ra nêverdê

  • 10:25 3 Nîsane 2024
  • NAROJANE
 
Rozerîn Gultekîn
 
AMED - Dayîka Mahsum Karaoglanî ke rayîrşîyayîşê ‘Rayîrê verbi Roje ra’ de ame qetilkerdiş, Sultan Karaoglane derheqê 20ine qetilkerdişê lajê xo de vat: “Wa embazê Mahsumî rayîrê ci ra fek vera nêdê û rayîrê ey ra şêrê.”
 
Bi wesîleya Rojbîyayîşê Rayberê PKKyî Abdullah Ocalanî serra 2004î ra heta nika rayîraşîyayîş û pîrozkerdiş pê yeno. Emser yeno pawitiş ke rayîraşîyayîş bi girseyî bo. 20 serrî yo şar vera heme astengî û qetilkerdişan de tepîya game nêeşto. Dayîka Mahsum Karaoglanî ke serra 2009î de rayîraşîyayîş de ame qetilkerdiş, Sultan Karaoglane ajansê ma rê qisey kerd û venga wayîrvejîyayîşê rayîraşîyayîşî kerd. 
 
Her raşte sahneyê rizgarîye yo 
 
Emser zî do 4ê Nîsane de rayîraşîyayîş pê bêro. Yeno pawitiş ke girse do bi serkêşîya KCD, TJA, DBP, MEDTUHAD-FED, MEBYA-DER, DEM Partîye de bêro têkişt û pîya şêrê Amara. Dayîka Mahsum Karaoglanî ke rayîraşîyayîşê ‘Rayîrê ver bi Roje ra’ de ame qetilkerdiş, Sultan Karaoglane derheqê 20ine rayîraşîyayîşo ke do pê bêro de qisey kerd û dîyar kerd ke ganî her kes wayîrê rayîraşîyayîşî bivejo. 
 
Têkoşînê Mahsumî tutîye de destpêkerdo 
 
Sultane da zanayîş ke Mahsum hema şenik bî serranê 90î de tedayan vera dewa xo Taşmaliyî ra koçê Îzmîrî kerde û dimayê demêk tepîya agêrayê Erxenî. Sultane wina dewam kerd: “Hema şenik bî wayîrê hişmendîya nasnameyê kurdî de bî. Vera emrê xo yê şenik têkoşînî ra hes kerdêne. Waştêne kurdî serkewte bê. Waştêne ez her tim aktîf têkoşîn de ca bigêra. Unîversîteya Dîcle de beşê matematîkî wendêne û sinifê 3ine de bî. Bi embazê xo reyde şîyêne rojbîyayîşê Apo. Destur nêdîyabî. Vernîya înan girewtî û leşkeran gule reşênayo. Embazê ci Mahsumî dayê serê milê xo û berdê nêweşxane. La heta ke xeber ma rê ame Mahsum dinyaya xo bedelnayo. Coka ra 4ê Nîsane seba ma zaf muhîm o. Ma emser a roje ciwîyenê.”
 
‘Wa embazê ci fek vera nêdê’ 
 
Sultane wina qiseykerdişê xo peynî kerd: “Ma her tim rayîrê şehîdanê xo de yê. Ma înan qet xo vîra nêkenê. Tu sebeb çin o dayî Mahsumî ro. Yê ke piro dayî ganî biameyêne cezakerdiş. Bi hezaran kes ameybî cenazeya Mahsumî. Kes Mahsumî vîra nêkeno. Ma êdî şer nêwazenê. Ma aştî wazenê. Wa embazê Mahsumî rayîrê Mahsumî de şêrê.”