ANQARA - Hemsereka Pêroyî ya verêne ya DBPyî Sebahat Tuncele mesajê xo yê derheqê xoverdayîşê Wanî yê derheqê weçînayîşê herêmî de vat: “Rejîmê qeyûmî û caardişê tecrîdî tena şarê kurdî nê, heme şaranê Tirkîya teng kerde. Êdî wextê vindarnayîşê înan ameyo û xoverdayîşê Wanî eşkeno seba nê bibo destpêk.” 

 

Hemsereka pêroyî ya verêne ya Partîya Herêmê Demokratîke (DBP) Sebahat Tuncele serê nameyê cinîyê tepişte yê Zîndanê Cinîyan ê Sîncanî de, derheqê weçînayîşê herêmî yê 31ê Adare û netîceyê ci de mesajêk JINNEWSî rê şirawit. Sebahate mesajê xo de derheqê azadîya fîzîkî ya Rayberê PKKyî Abdullah Ocalan û derbazbîyayîşê qonaxêke newî yê çalakîya tepişteyê sîyasî ke 27ê Teşrîna Peyêne ya 2023yî de seba wedaritişê tecrîdê serê Rayberê PKKyî û çareserîya problemê kurdî ke zîndanan de dest bi grevê vêşanîye kerde de ercnayîş kerd. 

 

'Do rayîrê demokrasî abikero’ 

 

Sebahate mesajê xo de dîyar kerd ke polîtîkayê qeyûmî yê dewlete Kurdistan de ancî rijîya û wina vat: “Îrade û xoverdayîşê şarî tepîya game bi dewlete da eştiş. Sere de xoverdayîşê şarê ma yê Wanî pîroz kena û paştîdayîşê şarê Kurdistanî, Tirkîya û dezgehê sivîlî yê bi şarê ma yê Wanî reyde pîroz kena. Ez heskerdiş û rêzdarîya xo pêşkêşê înan kena. No têkoşîn û xoverdayîşê hempar do ma rê rayîrê demokrasî û azadîye abikero. Serra 2015î ra nata, şîdet û polîtîkayê zorî yê sîstematîk, rejîmê qeyûm û tecrîdî, tena şarê kurdî nê, heme şaranê Tirkîya teng kerdê. Wextê vindarnayîşê nê çîyî ameyo, xoverdayîşê Wanî seba nê çîyî destpêk o." 

 

'Veng bidê vengê ke berz beno' 

 

Sebahate mesajê xo de qetî kerd ke ganî îradeyê şarî rê hurmet bêro girewtiş û wina vat: “Bi na wesîla ma serkewtişê DEM Partî yê weçînayîşan pîroz kenê û serkewtişp hemşaredar û endamê meclîsê ma yê weçînitene rê wazena. Sewbîna xoverdayîş û têkoşînê zîndanan açarîya qonaxêk newe. Ma sey cinîyê Zîndanê Sîncanî kewtê prosesêk newî yê çalakîyan. Seba peynîya sîstemê îşkenceyê Îmraliyî bêro û seba şertê weşîye, asayîş û azadîya birêz Ocalanî, ma do ne akerde û ne zî girewte nêvejê pêvînayîş û mehkemayan. Sewbîna ma do heqê qiseykerdişê bi telefonî nêşuxilnê. Ma venga rayaumûmî ya demokratîk a Tirkîya, bi taybetî zî şarê kurdî kenê ke vengê zîndanan bieşnawê û ê zî bibê vengo ke zîndanan ra vejîyeno û pîya rayîrê aştî û azadîye abikerê. Ez Roşanê Remezanî şarê ma rê pîroz kena."