AMED - Meryem Soyluya ke tewrê rayîraşîyayîşo ke seba pîrozkerdişê 4ê Nîsane Rojbîyayîşê Rayberê PKKyî Abdullah Ocalanî bî, manaya rayîraşîyayîşî yê seba nê çî vat. Meryeme wina vat: “Ganî ma wayîrê Serekatî ke bîyo wesîleya bîyayîşê şarêk bivejê û ganî ma rojbîyayîşê ci de biherikîyê Amara.” 

 

Rayberê PKKyî Abdullah Ocalan netîceyê komployek mîyanneteweyî de 15ê Sibata 1999î de ardê Tirkîya û a roje ra nata Îmrali de binê tecrîdê giran de yeno tepiştiş. 4ê Nîsane ke Rojbîyayîşê Abdullah Ocalanî yo her serre bi pîrozkerdişê cîya cîyayan yeno pêşwazîkerdiş. Yew nê pîrozkerdişan ra rayîraşîyayîşê Amara yo. Bi amancê pîrozkerdişê rojbîyayîşê Abdullah Ocalanî 2004î de bi serkêşîya Federasyonê Komeleyê Keyeyê Tepişteyan (TUHAD-FED) rayîraşîyayîşê yewine Amara de pê ameybî. Rayîraşîyayîşê peynî ke pê ameybî zî 1ê Sibate de Qers û Wan de ameyî destpêkerdiş. Meryem Soyluya ke her serre tewrê rayîraşîyayîşî bena, amancê tewrbîyayîş û manaya rayîraşîyayîşî vat.

 

 ‘Birêz Ocalan nê şarî şîyar kerd’ 

 

Meryeme bale ant serê muhîmîya rayîraşîyayîşê Amara û vat: “4ê Nîsane seba ma rojêke pîroz a. Birêz Ocalan şarê kurdî şîyar kerd. Bî serkêş. Xeylê ercaye yo. Ez her tim tewrê pîrozkerdişê rojbîyayîşê serekatî bena. Bi hezaran rey a dayîke rê dua kena ke şexsîyetêk sey Abdullah Ocalanî arda dinya.”

 

‘Waştî kurdan çinî bikerê la ser nêkewtî’ 

 

Meryeme ard ziwan ke problemê kurdî xo paweno tarîxê verên û sîstemê kolonyalîst her tim waşto ke şarê kurdî çinî bikero. Meryeme wina dewam kerd: “Vera heme xîretkerdişê çinîkerdişî yê sey serrewedarnayîşê Şêx Seîdî xeylê serewedarnayîş pê ameyî. Semedo ke Şêx Seîd paştîdayîş û wayîrvejîyayîşêk xurt şarî ra nêgirewtî, ame daliqnayîş. Kişta polîtîkayê qetilkerdişî yê asîmîlasyonî zî dewre de bî. Waştî kurdan çinî bikerê la ser nêkewtî.”

 

‘Ma girêdayeyê dewa û Serekatîyê xo yê’ 

 

Meryeme qiseykerdişê xo yê peyênan de da zanayîş ke aye bi tut, torinê xo û şarî reyde wayîrê dewaya xo vejîyena û nê çîyan vat: “Rayberêk winasî nêameyo dinya. Ma girêdayeyê dewa û Serekatîyê xo yê. Heta peynîya cuya xo ma do girêdayeyê ci bî. Ganî ma wayîrê Serekatîyê xo bivejî. Ganî ma biherikî Amara. Wexto ke ma ver bi Amaraye ra şiyêne ma xeylê îşkence û tedayan vînayêne. Bi gazan hêriş kerdêne. Kerra eştêne, pê copî ma kuyayêne. La nê hêrişî vernîya kêfweşîya ma nêgirewtêne. Ma seba Serekatîyê xo eşkenê canê xo bidê. Ganî şarê ma 4ê Nîsane de biheriko Amara. Ez venga heme şarê kurdî kena. Ma bi girseyî rojbîyayîşê Serekatîyê xo pîroz bikerê.”