WAN - Hemsereka DEM Partî ya Wanî Gulşen Kurte weçînayîşê herêmî ke do 31ê Adare de pê bêro ercnaye û venga tewrbîyayîşê mîtîngo ke do 29ê Adare de pê bêro kerd û vat: “Şarê ma do îradeyê xo sindoqan de rono raşte û qeyûman bişirawo.”

 

Şarê kurdî bi tewrbîyayîşê sehezaran kesî xeylê bajarênê Kurdistan û Tirkîya de adirê Newroze tavist û vengê xo vera polîtîkayê zilm û tedaye de berz kerd. Şarê kurdî nika zî xo seba weçînayîşê 31ê Adare amade keno. Partîya Têduştîye û Demokrasîyî yê Şaran (DEM Partî) do 29ê Adare de Raşteyê Beşyolu de mîtîngêke pê bîyara. Hemsereka DEM Partî ya Wanî Gulşen Kurte derheqê xebatê weçînayîş û amadekarîyê mîtîngî de qisey kerd.

 

 ‘No weçînayîş weçînayîşê tepîyagirewtişî destkewtişan o’ 

 

Gulşene da zanayîş ke prosesêk muhîm de yê û vat: “Tecrîdê serê Rayberê PKKyî Abdullah Ocalanî her ke şino giran beno. Bi tecrîdê serê Abdullah Ocalanî wazenê şarê kurdî bêro pelçiqnayîş. Heto bîn de zîndanan de tepişte vera tecrîdî de greve vêşanîye de yê û dayîk zî teber de Nobeta Edaletî de yê. No prosesêk muhîm o. Ma nika ver bi weçînayîşê 31ê Adare ra şinê. Weçînayîş seba şarê ma muhîm o. No weçînayîşêk normal nîyo. No weçînayîş weçînayîşê tepîyagirewtişî destkewtişan o. Ma do heqanê xo yê ke qeyûman xesp kerdî bigîrê û hesab bipersê.” 

 

‘Bawerîya ma bi şarê ma tam o’ 

 

Gulşene ard ziwan ke weçînayîşî rê demêk kilm mendo û wina dewam kerd: “Ma dewe, qeza û taxan de bi şarî reyde kombîyayîşan kerd. Ma bi şarê xo reyde yenê têkişt. Ma çareserîyan munaqaşa kenê. Ma şarê xo goşdarî kenê. Rexneyê înan gênê. Xêrcê nê komîsyonê ma yê weçînitoxan bi aktîf est o. Hemwelatijê ma yê teberê bajarî ke îmkanê înan çin o bêrê, wendekarê ke îmkanê înan çin o bêrê, bi hemkarîya komsîyonî do 31ê Adare de bêrê rayê xo bierzê. Kişta înan de xebatê ma yê plankerde dewam kenê. Bi taybetî weçînayîşî rê demêk kilm mend û ma bi şarê xo reyde raşteyan de yenê têkişt. Ma zanê ke do şarê ma bi îradeyê xo şaredarîyan bigêro û rayîr ra bero. Bawerîya ma bi şarê ma est a.”

 

‘Şarê ma do wayîrê îradeyê xo bivejîyo’ 

 

Gulşene dîyar kerd ke seba pawitişê sindoqan û wayîrvejîyayîşê rayan planan kerdî û wina dewam kerd: “Wezîfedarê sindoqan dîyar bîyî. Muşahîd û qertê muşahîdan amade yê. Planê ma bê eksîyêk rayîr ra şino. Heta nika ma raştê astengêyêke nêameyî. Ma tena paweyê weçînayîş ê, wezîfedar û muşahîdan kenê. Na babete de hîsin têbigêrê.” 

 

‘Aşma Adare bî aşma têkoşîn û xoverdayîşî’ 

 

Gulşene derheqê aşma Adare de zî ercnayîş kerd û wina vat: “Aşma Adare aşma xoverdayîş û têkoşînî ya. 8ê Adare, Newroze û weçînayîş a. Coka ra bî aşma xoverdayîş û têkoşînî. Ma 8ê Adare bi coş pîroz kerd. Ma 17ê Adare de zî bi coş Newroze pîroz kerd. Ma nika şinê weçînayîş. Ma heme kesî 29ê Adare de dawetê Raşteyê Beşyolî yê Wanî kenê.”