Pelşîn Çetînkaya

 

ÊLIH - Merkezê Kulturê Baharî 24 serrî verê cu Êlih de vera qirkerdişê kultur û ziwanê kurdkî de sey alternatîf hetê komêke ra ame awankerdiş. Çîçek Çelîka ke bi komêk embazê xo reyde Merkezê Kulturê Baharî awan kerdî, wina vat: “Ma do vera qirkerdişî de alternatîfê xo her tim aver bifînê. Bi dezgeho ke ma akerd de ma do kurdkî bi her kesî bidê naskerdiş û aver bifînê.” 

 

Kultr û ziwanê kurdî bi serran o bi polîtîkayê asîmîlasyonî reyde yeno rî bi rî û xîret yeno kerdiş ke kurdkî bêro çinîkerdiş. Vera nê înkar û asîmîlasyonî de serra 2000î Êlih de bi amancê alternatîf bêro awankerdiş Merkezê Kulturê Baharî (BKM) ame awankerdiş. 

 

Yew awankarê BKMyî û endama Koma Koletîfa Rîtmê Azade, Çîçek Çelîke derheqê xebatê dezgehî de ajansê ma rê qisey kerd.

 

Ma wazenê bi BKMyî reyde kurdkî bidê naskerdiş û aver bifînê 

 

Çîçeke vat serra 2000î de bi amancê vera qirkerdişê kultur û ziwanî de alternatîf awan bikerê û kurdî hîna zêde mîyanê şarî de vila bikerê Merkezê Kulturê Baharî awan kerdî û wina dewam kerd: “Amancê awankerdişê nê dezgehî, awankerdişê alternatîf bî. Ma her tim qalê qirkerdişê kulturî kenê. Seba awankerdişê alternatîf ma dezgeh awan kerd. Hedefê ma naskerdişê kultur û muzîkê kurdî û averberdiş o.”

 

 ‘Vera polîtîkayê asîmîlasyonî de alternatîf awan kerdî’ 

 

Çîçeke wina qiseykerdişê xo dewam kerd: “Dezgehê ma de dersê erbane, saz û kemanî yeno dayîş. Seba alternatîf bibê ma xebate rayîr ra berd. Prosesê vernîya ma de ma do sinif û qursan akerê. Ma projeyê xo pêşkêşê şaredarîye zî kerd. Ma do çîyê hîna weşikan bikerê. Ma serê qursanê xo de vindenê. Ma wazenê xo biresnê hîna zêde ciwanan. Dezgehê ma her roje akerde yo. Her kes eşkeno bêro tîya.”

 

 ‘Bi hawayêkê kêfî asteng kerdî’ 

 

Çîçeke dîyar kerd ke bi hawayêkê aktîf 8ê Adare, Newroz, mîtîng û bernameyê kulturî de ca gênê û vat ke xeylê reyan vejîyayîşê serê sahne înan rê ameyo qedexekerdiş û astengkerdiş. 8ê Adare ra ver bernameyê ma yê Mersîn û Edene do pê biameyêne. Ma şîyî Mersîn. Eleqeyê şarî zaf baş bî. Ma vejîyayî serê sahne. Dima ra ma do bişîyayêne Edene. La bi hawayêkê kêfî destûr nêdayî û qedexe kerdî. Ma nê qedexeyan qebûl nêkenê û do muzîkê xo her tim bikerê.”

 

 ‘Ma û ziwanê ma nas nêkenê’ 

 

Çîçeke qiseykerdişê xo yê peyênan de da zanayîş ke rojanê verênan de mîtîngê înan yê Farqînî est bî û polîsan xîret kerdî ke asteng bikerê û wina peynî kerd: “Polîs kewtî raşte û xîret kerdê ke ma asteng bikerê. Coka ra ma erê kewtî raşteyê mîtîngî. Dima ra nêverdayî ma deyîranê xo bivajê. Deyîrê ke ma vatêne ê weçînayêne. Vatêne deyîra xo bibedelnê. Coka ra ma xîret kerd ke alternatîfan awan bikerê. Ma vera qedexeyan vindenê û ma do kêm nêbê. Ma do her tim serê sahne de bê.”