Rozerîn Gultekîn

 

AMED - Cinîyan verê Newroza Amedî ke bi sloganê 'Wurzê we, wext wextê serkewtiş û azadîye yo' do pê bêra venga tewrbîyayîşî kerdî û dîyar kerdî ke ganî vera Dehaqan de raşteyê Newroze pirr bibo û vatî: “Wa seba cuya azade cinî Newroze de vengê xo berz bikerê.” 

 

Newroza 2024î ke startê ci qezaya Depî ya Xarpêtî ke warê Mazlum Doganî bî û Kadîfekale ya Îzmîrî ke warê Rahşan Demîrele yo ke aye zî bedenê xo dabî adir ver, do 21ê Adare de ‘zerrîya Kurdistanî’ Amed de bêra pîrozkerdiş. Verê Newroze, heme qezayê Amedî de bi sloganê 'Wurzê we, wext wextê serkewtiş û azadîye yo' pîrozkerdiş pê ameyî. Aktîvîsta Têgêrayîşê Cinîyê Azade (TJA) û endama Komîteya Tertîpî ya Newroze Nesîbe Uygun û hemsereka Partîya Têduştîye û Demokrasîyî yê Şaran (DEM Partî) ya Amedî Pinar Sakik Tekîne dîyar kerdî ke do 21ê Adare de Parka Newroze de seba azadîya fîzîkî ya Abdullah Ocalanî vengê xo berz bikerê û venga tewrbîyayîşî kerd.

 

 ‘Meşaleyê Newroze destê cinîyan de berz beno’ 

 

Nesîbe Uygune da zanayîş ke Newroze seba şarê kurdî muhîm a û bi serewedarnayîşê Kawa ke vera Dehaqî de dayo destpêkerdiş, bi serewedarnayîşê zîndananê Amedî dewam kerd. Nesîbeye nê çîyan vat: “Dima ra meşaleyê Newroze Zekîye Alkan û Rahşan Demîrele wedarit. No meşale ewro hetê cinîyên kurdan ra yeno berzkerdiş. Newroze her tim xo reyde hêvî û xoverdayîş arda. Bi serran o serê Birêz Ocalanî de tecrîd pê yeno. Emser do bi waştişê azadîya fîzîkî ya Abdullah Ocalan û çareserîya problemê kurdî Newroze pê bêra.” 

 

 ‘Do cinî vengê xo berz bikerê’ 

 

Nesîbe dîyar kerd ke Amed zerrîya Kurdistanî yo û coka ra zî ganî Newroza tîya zaf xurt derbaz biba û wina dewam kerd: “Ganî raşteyê Newroze de ruhê yewîtîya şarê kurdî bêro mojnayîş. Îqtîdar xîret keno ke cuya cinîyan şekil bikero. La cinî vera nê de sere wedarnenê. Vanê “Wext Wextê Cinîyan o.” Adirê Newroze bi rojan o destê cinîyan de yo. Seba cuyêka azad û demokratîke do cinî vengê xo Newroze de berz bikerê. Ganî her kes roja Newroze de raşteyê Newroze de cayê xo bigîro.” 

 

Bi hêzo ke 8ê Adare ra ameyo girewtiş şêrê Newroze 

 

Pinar Sakik Tekîne zî ard ziwan ke bi hezo ke 8ê Adare Roja Cinîyan a Dinya ra girewtî şinê Newroze û wina dewam kerd: “Ma sey torinê Medan 21ê Adare de Newroze pîroz kenê. Newroza 2024î seba kurdan zaf muhîm a. Birêz Ocalan 25 serrî yo tepişte yo û 36 aşmî yo ci ra tu xeberêke nîna girewtiş. Embazê ma seba nê tecrîdî bişiknê, bedenê xo dayî vêşanîye ver. Sewbîna Nobetê Edaletî est ê. Rayîr ra şîyayîşê Azadîye pê ame. Ma do Newroza 2024î de vajê 'Wurzê we, wext wextê serkewtiş û azadîye yo'.” 

 

‘Dîmenê 31ê Adare do 21ê Adare de diyar bibo’ 

 

Pinare qiseykerdişê xo yê peyênan de wina veng kerd: “Tabloya 31ê Adare do 21ê Adare de dîyar bibo. Roja ma ya Newroze vera Dehaqan de pê yena. Ma heme bi reng, bawerî û ziwanê xo seba ke vajê 'Wurzê we, wext wextê serkewtiş û azadîye yo' raşteyê Newroze de bê.”