Oznûr Deger

 

RIHA - Kurdistan ke tede rewşa ekonomîye her ke şina xira bena, hemwelatijî aşma Remezanî bi feqîrî derbaz kenê. Hemwelatija bi nameyê Mukades Çaglare vat: “Ma seba fitarî werd goreyê zerrîya xo nêvirazenê û her çî bîyo vaye.” 

 

Sînorê feqîrîye 52 hezar û 954 o, yê vêşanîye zî 18 hezar û 973 yo. Hemwelatijî nê krîzê ekonomîye de xîret kenê ke bi 17 hezar meaşê asgarî îdare bikerê. Serra verêne vayeya kîloyê nanî 35 TL bî la emser 40 TL yo. Kîloyê firingîyan 37 TL, yê îsotî 73 TL, yê xiyar 45 TL, yê balcan 59 TL, marulêk zî 43 TL yo. Kîloyê birincî 150 TL, yê mercûye 57 TL, yê goştî zî 600 TL yo. Kîloyê kerge zî 160 TL yo. Goreyê nê vayeyan fitarî ya ke serê sofre de şorbe, girar, kerg û selete bibo rê 881 lîrê lazim o. 

 

Hemwelatijê ke Pirsûs de ciwîyenê dîyar kerdî ke mecburê serê sifreya xo ya fitarî ra kêm bikerê. Cinîyê Pirsûsî dîyar kerdî ke nêeşkenê îdareyê xo bikerê.

 

 ‘Ma nêeşkenê îdareyê xo bikerê’ 

 

Cinîya bi nameyê Sabîha Aytekîne (40) da zanayîş ke ê nêeşkenê îdareyê xo bikerê û wina dewam kerd: “Bi ameyîşê aşma Remezanî reyde ma nêeşkenê werdêk virazê. Firingî zaf vay a. Sebze heme vaye yo. Ma nêeşkenê goşt bigîrê. Ma girar virazenê. Verê cu zî ma nêeşkayêne sifreyê xo bixemilnê la emser ma nêeşkenê tu çîyêk bigîrê. Ma nêeşkenê sebze zî bigîrê.” 

 

Ferîde Şahîne (53) zî wina ard ziwan: “Verê cu aşma Remezananî de werdê serê sifreyê ma zêde bî. Ma nika çend şinayîyan gênê 100 TL şino. Ma şinê bajar 500 TL şino. Serra verêne mi 250 TL dayêne. Emser di kat bîyo. Saye 30 TL, porteqal 15 TL yo. Ma nêeşkenê lazimîyê xo yê ferzan bigîrê.”

 

 ‘Ma nêeşkenê goşt bigîrê’ 

 

Mukkades Çaglare (40) zî dîyar kerd ke na rewşe seba kesê ke kîra de yî hîna zehmetin a û wina dewam kerd: “Faturayê ceyran zêde yena. Ez aşme de hezar TL ra zêde heqê ceyran dana. Seba herînayîşê aşma Remezanî ma 3-4 hezar TL da. La ma çîyêk goreyê zerrîya xo nêgirewt. Her çî vaye yo. Goşt vaye yo. Kîloyê goşt 550 TL yo. Kerge zî vaye ya. Ma nêeşkenê bigîrê.” 

 

Hacîre Bugurlu ya 21 serrî zî da zanayîş ke ekonomî vera qet kêfweş nîyê û vat dewlemendî hîna zêde dewlemend benê û feqîr zî her ke şinê feqîr benê.