‘Weşîya cinî û tutan tehluke de ya’

  • 10:31 24 Sibate 2023
  • NAROJANE
 
Sema Çaglak - Rabîa Onver
 
DÎLOK - Aktîvîsta TJAye Emîne Înane bale ant problemê pakîye ke bajar de erdlerzî veyo cuyayîş ser û dîyar kerd ke cinî û tutî nika problemanê weşîye û janî reyde rî bi rî yê. 
 
6ê Sibate de merkezê ci qezaya Bazarcixî ya Mereşî de girdîya ci 7.7î de di erdlerzî pê ameyî. Erdlerzo ke qewimîya 11 bajaran ser de tesir viraşt. Erdlerzî ra tewr zêde cinî û tutî tesir bîyî. Seba ke problemê cinîyan bêro çareserkerdiş lazimî bi paştîdayîşêk gird esta. Têgêrayîşê Cinîyan yê Azadan (TJA) roja ewilîn ra nata herêma erdlerzî de xo resneno cinîyan. Aktîvîsta TJAye Emîne Înane derheqê babete de qisey kerd. 
 
Emîneye da zanayîş ke înan 6ê Sibate de bi serkêşîya cinîyan koordînasyonêk awan kerdî û vat: “Ma sey TJAye 6ê Sibate ra heta nika ma bi lezgînî wezîfedaranê xo dîyar kerd û şirawit herêmanê erdlerzî. Na çarçewa de ma bername û plansazîyê xo vetî. 10 bajaran de aktîvîstê ma estê. Mîyanê şarî de hem hetê weşî hem zî hetê hetkarîye de zemînêk awan kerdî. Dehê nê erdlerzî giran o. La tede bêîzmalî xeylê zêde yo. Bobelatêk winasî de ganî dewlete heme çimeyanê xo bida seferberkerdiş. La çi heyfo ke 6 Sibate ra heta nika binê xirban de hema zî bi hezaran merdeyî estê. Hemwelatîyî bi îmkananê xo merdimanê xo binê xirban ra vetî. Çike dewlete uca de hadre nêbî û nêresaye hetkarîya hemwelatîyanê xo. Herinda ke dewlete de hemwelatî û tîmê xelisnayîşî yê Ewropa resayî hetkarîya hemwelatîyan.” 
 
‘Butçeya seba erdlerzî bîyena şer’
 
Emîneye dîyar kerd ke îqtîdar nê erdlerzî xo rê kerd firsend û wina dewam kerd: “Dewlete na butçeya ke dana şerî seba şarê xo xerc bikerdêne do hende hûmara merdeyan zêde nêbayêne. Sebebê zêdebîyayîşê hûmara merdeyan, kêmanîyê tîmê înan û xebata cigêrayîş û xelisnayîşî ke erê pê ameyî yo. Hemwelatîyî terke mergî ameyî kerdiş. Qezaya Cebelînur û Islahîye ke erdlerz nê cayan wêran kerdbî de hemwelatîyî bi îmkananê xo hetkarîya şarî kerd. Vera îqtîdarî de reaksîyon û nêrazîbîyayîşê şarî her ke şino gird beno.”
 
'Ekîpmanê weşîye lazim ê’
 
Emîne peynîya qiseykerdişê xo de bale ant problemê cinîyan ke cinî cuyenî ser û vat: “Roja ewilînan de şar bi şînê xo reyde meşgul bîyêne. La her ke şî lazimîya cinî û tutan zêdîya. Kişta herêma ke erdlerz tede qewimîya de awêka lêşin vîyarena û qenalîzasyonî ra herîkîyena. Hemwelatîyî nêeşkenê awe bişimnî û nêeşkenê sereye xo bişuyî. Cinî nêeşkenê lazimîyanê xo yê xozayîyan pê bîyarî. Hetê hîjyenî de problemanê cîdî û nêweşîyê cîyayî yenê cuyayîş. Tutî zî bi no hawa cuyenî. Seba cinî û tutan ganî tîmê hetkarîye zêde bibê. Coka ra ganî bi lez ekîpmanê weşîye seba cinî û tutan şêrê cayanê erdlerzî.”