‘Ma do xebatê xo yê derheqê tecrîdî dewam bikerê’

  • 09:11 1 Sibate 2023
  • NAROJANE
Rozerîn Gultekîn
 
STENBOL - Endama Koperatîfê Avûkatê Cinîyî yê Barcelona Paula Ponze ke heyetê Delegasyonê Mîyanneteweyî yê Hemverê Tecrîdî de ca girewtêne dîyar kerd ke seba wedaritişê tecrîdî û awankerdişê Konfederalîzmê Demokratîke, ganî têkoşînê yewbîyaye bêro dayîş.
 
Endama Delegasyonê Mîyanneteweyî ke hemverê tecrîdî de 7 welatan ra 36 kesan ra pê ameyêne, mabenê 25-27ê çeleyî de Stenbol, Amed û Anqaraye de pêvînayîş pê ardî. 12 kesê ke heyetî de ca girewtêne hirê rojan Stenbol de derheqê prosesê siyasiye û problemanê ke cinî cuyenî de pêvînayîşan pê ardî. 
 
Endama Koperatîfê Avûkatê Cinîyî yê Barcelona Paula Ponze derheqê amacanê xebatan û sewbîna çimdarîyanê xo de ajansê ma rê qisey kerd.
 
Çîyo ke ameyo cuyayîşîşkence yo
 
Paulaye dîyar kerd ke tecrîdo ke pê yeno vera Abdullah Ocalani ra xeber nîna girewtiş û coka ra fikarinî û vat: “Tecrîd bêhuqûqî yo. tepiştişê co bêhuqûqî yo. Ganş tu kesêk nê şertan mîyan de nêro tepiştiş. Rewşa ke zîndanen de yena cuyayîş îşkence ya. No bi eşkera îşkence yo. Na rewşe polîtîkaya hukmatê Tirkî mojnena. Goreyê ma ganî Abdullah Ocalan û tepişteyê bînî yê ke Îmrali de yî bi lez serbest bêrî veradayîş.” 
 
‘Pêro serkewtişî do bibî serkewtişê dinyaye zî’
 
Paulaye dewamê qiseykerdişê xo de qala amacanê zîyaretê heyetî zî ercnaye û wina dewam kerd: “Amacê cigêrayîşkerdişê heqanê merdiman yê hetê Tirkîya û Kurdistanî bî. tena heqanê komelî nê ma waşt ke heqanê cinîyan, karkeran, tepişteyan zî cigêrayîş bikerî. Bi taybetî rewşa tepişteyanê cinî û tepişteyanê sîyasî xiran a. Bêhuqûqîyê ke yenê cuyayîş demokrasîye ra dûrî yî. Ez aktîvîstêk polîtîk a. Her aktîvîsta polîtîke paştî dana Konfederalîzmê Demokratîke. Eynî wextî de azadîya şaro ke ameyo pelçiqnayîş zî hedîseyêk muhîm o. Na herême de her çîyo ke ser bikewo do bibo serkewtişê pêro dinyaye. Coka ra heta ke destê ma ra bêro ganî ma bibî hetkar.”
 
Xebat do xebat bikerê 
 
Paulaye tewr peynî bale ant rewşa tepişteyanê nêweşan û wina qedênaye: “Rewşa tepişteyanê nêweşan bi raştî zî xeylê muhîm a û xirab a. Nêeşkenê lazimîyanê xo yê ferzan bi ca bîyarî. Pêro zîndanan de hêrişê sistematik, zext û şîdet estî. Xebatê ma do bi zîyaretan sînor nêmano. Ma agêrî welatê xo ma do xebatan dewam bikerî. Ma do rewşa tepişteyan û babeta kurdî her tim bîyarî ziwan û ser de vinderê.”