Melîke Aydin

 

ÎZMÎR - Dayîkê Aştîye dîyar kerdî ke ganî pêro kurdî û rayaumûmî yê dinya verê xo bidê Wargeha Mexmûrî û venga îdarekarîya Barzanî zî kerdî û vatî, ganî peynîya hemkarîya bi Tirkîya reyde bîyarê.

 

20ê Gulane ra Artêşa Iraqî hewl dana derûdorê Wargeha Multecîyan ê Şehîd Rustem Cudî (Mexmûr) bi têlan kerdê ablûqa, bi çeke, bendê ablûqa û seyan leşkerî reyde hewldayîşê xo domnena. Însîyatîfê Dayikê Aştîye ya Îzmîrî derheqê babete de dîyar kerdî ke ganî îdarekarîya Barzanî ya Herêma Federal a Kurdistanî peynî hemkarîya bi Tirkîya reyde bî. Dayîkê Aştîye dîyar kerdî ke ganî pêvînayîşê bi Rayberê PKKyî Abdullah Ocalanî reyde bêrê destpêkerdiş û ganî heme rayaumumî yê dinya û kurdî bala xo bidê hêrişê hemverê Wargeha Mexmûrî.

 

‘Ganî ma hemverê nê zulmî vejîyê’

 

Dayîka Aştîye Muzeyyen Kortak xoverdayîşê dayîkê Mexmûrî silam kerd û da zanayîş ke eke paştdayîşê Tirkîya çinbîne do hêriş pê nêameyîne û wina vat: “No hêriş girêdayeyê Tirkîya yo. Gelo do nê hêrişê bi gonî kengî peynî bibê? Bi viraştişê dêsan do zulm hîn zêde bikerê? Ma şîdetê ekonomî û fîzîkî temaşe kenê û êdî bêzar bîyê. Ma wazenê ke nê tedayê serê şaran ra wurzê. Eke ewro Barzanî paştdayîş nêdo ci do nê hêrişî pê nêrê. Ganî ma paştdayîş bidê şarê xo. Ma  dayîkî nê qebûl nêkenê û ganî kurdî hemverê nê bê. Şima nêeşkenê şarê kurdî biqedênê.”

 

‘Seba aştîye ganî tecrîdê Îmraliyî bêro wedaritiş’

 

Dayîka aştîye Nufusa Ataş zî dîyar kerd ke seba çareserîya problemê kurdî ganî ewil tecrîdê serê Rayberê PKKyî Abdullah Ocalanî bêro wedaritiş û wina vat: “Caardişê aştîye destê ci de yo. Ez venga Barzanî zî kena, wa nêbo hemkarê nê zulmî. Seba nê kesê serê ma seba koltuxê xo nê zulmî keno. Çi heqê ci esto wina bikero? Ma aştîye wazenê. Seba ma kurdî, erebî, tirkî ferq nêkenê. Ma vanê aştî û demokrasî bêro tu kes vêşan nêmano. Ganî ma kurdî nêbê hemkarê nê zulmî. Ganî Barzanî bi Tirkîya reyde hemkarî nêkero.”

 

‘Rojeva ma hêrişê hemverê Mexmûrî yê’

 

Dayîka Aştîye Peyruze Kurt zî bale ant serê hêrişê serê Wargeha Mexmûrî û wina vat: “Rojeva ma weçînayîş nîya, rojeva ma hêrişê hemverê Wargeha Mexmûrî ya. Ma aştîye wazenê. Wa dayîkî nêbermê û no şer peynî bibo. Belkî ewro rojeve tîya weçînayîş a la rojeva hêrişê hemverê Mexmûrî biba. Seba nê ganî  Barzanî wayê û birayanê xo nêroşo. Ma nê zulmî nêwazenê. Ganî ma şer vindarnê.”