Pervîn Buldane ra vengdayîş: Turê diyîn de zî qerarê xo dewam bikerê

  • 16:02 26 Gulane 2023
  • NAROJANE
 
AMED - Amed de kombîyayîşê çapamenî ke ame organîzekerdiş de Pervîn Buldane vat, "Ma reyke bîn nê vengdayîşî Amedijan rê kenê. Turê diyîne de zî şêrê serê sindoqana û raya xo bişuxulênê û qerardarîyê xo yê turê yewine de dewam bikerê."
 
Hemsereka Pêroyî ya HDPyî Pervîne Buldan, Wekîlê Partîya Çep a Keske Cengîz Çandar, George Aslan, Sevîlaye Çelenk û Mehmet Kamaç û sîyasetmedaro kurd Ahmet Turk qezaya Peyasî ya Amedî de rojnamegeran de ameyî têhet. Pervîne Buldan û Ahmet Turkî kombîyayîş de rojdem ercna.
 
Hemsereka Pêroyî ya HDPyî Pervîn Bûldane kombîyayîşî de qisey kerd û venga şîyayîşê serê sindoqan kerd. 
 
‘Ganî Erdogan şêro’
 
Pervîne da zanayîş ke ê seba weçînayîşê serekkomarîyê tûrê dîyînî kombîyayîş organîze kenê û dîyar kerd ke pêwa pêro astengiyan zî înan sey Partiya Çep a Keske weçînayîşî de serkewtiş bi dest kerdo. Pervîne dîyar kerd ke weçînayîşê serekkomarî tûrê dîyîne de seba ameyoxêke demokratîk û aştiyane xeylêk muhîm o û vat: “Sey Partîya Çep a Keske weçînayîşanê 14ê gulane de ma rixmê teda û dek û dolaban zî serkewtişêk vist destî. Weçînayîşê 28ê gulane seba dewamê nê serkewtişî, seba ameyoxê dmeokratîkî û ameyoxê cinî û ciwanan zaf girîng o. Ma tîya ra reyna venga şarê Amedî danê ke turê diyînî yê weçînayîşê serekkomarîye de şoro sindoqan ser û raya xo bido. Eke AKP û Erdogan reyna ser bikewê komelê Tirkîya reyna do bênefes bimano. Erdogan ganî şoro ke rayîrê demokrasî abibo. Eke Erdogan bimano şima zanenê ke do se bibo. Xora o çax ma do reyna xo ver bidê, têkoşîn bikerê la komel bênefes bimano. Ez venga pêro kurdan, tirkan û şarê Amedî danê ke ma 28ê gulane de şorê sindoqan ser û bivurnê. Ez her kesî rê serkewtiş wazena. Ma hêvî kenê ke 28ê gulane de reyna ser bikewê. Tîya de meseleya ma Kiliçdarogly yan zî Îtîfaqê Miletî nîyo. Meseleya ma ameyox o. Wa şarê ma reyna wayîrê sindoqanê xo vejîyo û raya xo bido.”
 
‘Hemverê faşîzmî ma vanê demokrasî’
 
Siyasetmedaro kurd Ahmet Turk zî dîyar kerd ke ê do hemverê faşîzmî do helwestê înan demokrasî bo û vat: “Ma prosesêkê girîngî ra derbaz benê. Wextanê peyênan de nîqaşanê nîjadperestan komelê ma şikna la ez venga şarê ma û ciwanan dana ke nêrê kayan, protesto mekerê. Boykoy do hetkarîya Erdoganî bikero. Seke Hemsereka ma Buldane îfade kerd ke ma seba ke verê demokrasî abibo û şar nefesêkê rehetî bigêro şorê sindoqan ser. Ma nê weçînayîşan de faşîzm nê demokrasî biweçînê. Ma do demokrasî yanî Kemal Kiliçdaroglu tercîh bikerê. Ma zî sey şarê xo qiseyanê nîjadperestan ra şikîyenê. La ganî ma nêxapîyê. Ganî ma pêro şorê sindoqan ser û wayîrê rayanê xo vejîyê.”
 
Kombîyayîş bi pers û cewaban peynî bî.