Zelîha û Muhammedo 9 serre 6ê Sibate ra nata vînîbîyayeyê

  • 09:27 24 Adare 2023
  • NAROJANE
Marta Somek
 
SEMSÛR - Roja ewilî ya erdlerzî ra nata Zelîhaya 45 serrî û lajê aye Muhammed Enes Demîro 9 serrî ra xebere nîna girewtiş. Merdimê Zelîhaye, Mîthat Arslanî dîyar kerd bi îmkananê xo 5 reyan xirban wedaritî û nimuneyê DNAye dayî. La hema zî merdimê înan nêameyî dîyîş û tena waştişêk înan esto no zî kesê ke erdlerzî de vînî bîyî wa bêrî dîyîş û no travma ra bêro xelisîyayîş.
 
6ê Sibate de merkezê ci Mereş de erdlerz qewimîya û 11 bajaran ser de tesîr viraşt. Erdlerzî de goreyê hûmara fermî 50 hezarî ra zêde kesî dinyaya xo bedilnayî. Seba ke îqtîdar û ekîbê xelisnayîşî erê şîyî herêma erdlerzî bi seyan hemwelatijî binê xirban de dinyaya xo bedilna. AFAD roja 6ine de şî Semsûr û tena ewnîya çend xirban û agêra. Herêma erdlerzî de hemwelatijî nika konan de manenê û têkoşînê cuye danê. Sewbîna 15ê Sibate de varayîşê varanî vera Semsur û Riha de laser verişt û bobelatê laserî de konê ke AFAD û Kizilay dabî wêran bîbî. Riha de 20 kesî laser de merdî û Tûtê Semsurî de zî 3 kesî merdî. Hemwelatijî îqtîdarî ra tu hetkarîyêk nêgirewt.
 
Tutê vînîbîyaye ra xebere çin a
 
Erdlerzî de xeylê tutan dinyaya xo bedilnayî û xeylê tutan zî keyeyê xo vînî kerd, înan ra xeylê zî vînî bîyî yan zî ameyî remnayîş. Xeylê tutî vînîbîyaye ya zî yê ke merdî derbazê qeydan nêameyî kerdiş. Xeylê keyeyî zî dîyar kenê ke tutê înan ya vînîbîyayeyî yan zî ameyî remnayîş. Cigîrayîşê keyeyan dewam keno. Nê tutan ra yew zî Muhammed Enes Demîro 9 serrî û dayîka ci Zelîha Demîra 45 serrî yê.
 
6ê Sibate ra nata vînîbîyayeyê
 
Zelîha û Muhammed bi keyeyê xo reyde taxa Eskî Saray ya Semsurî de mendêne. Di way û birayê înan dinyaya xo bedilna û pî û birayêk ameyî xelisnayîş. Muhammed û Zelîhaye ra zî tu xebere nîna girewtiş. Merdimê Zelîhaye Mîthat Arslanî ajansê ma rê qisey kerd.
 
5 rey xirbî ameyî wedaritiş
 
Mîthatî dîyar kerd ke Zelîha, mêrdeyê aye û çar tutê ci erdlerz de keye de bîyê û vat: "Birayê Muhammed vano ke Muhamed oda de bi û hewl da biremo. Di tutî dinyaya xo bedelnenê. Pî û birayê bînî xilas benê. Ma Muhammed û Zelîha nêdî. Nê prosesî de tu ekîbî nêameyî. Semsur de ma paştdayîş nêdî û Stenbol de embazê zerrîwazî ameyî. Ma bi îmkanê xo 4 rojan bi pêroyî 5 rey xirbe wedarna. La ma Muhammed û Zelîha nêdî. 6ê Sibate ra ma tu zanayîş nêgînê."
 
Xebatî bênetîce mendî
 
Mîthatî dîyar kerd ke muracatê dozgerî û polîsan zî kerdê û vat: “Ma testê DNAyî dayî. Netîce şirawit Amed. Uca ra zî netîceyêk nêvejîya. Qeydê nêweşxaneyê şirawitê bajarê bînan çin ê. Nika bajar bi bajar gêrenê. Dozgerî vato do di aşmî dewam bikero. Xeylêk tutê bêwayîr estê. Aqûbetê înan nîno zanayîş. Ganî nê tutî bêrê vînayîş. Ganî sazgehê komelê sivîlî lezkî ê tutan  travma ra xelas bikerê û rehabîlîtî bikerê. Ma cigêrayîşê xo yê seba Muhammed û Zelîha dewam kenê. Yewin waştişê ma oyo ke erdlerzeyê vînîbîyayeyî bêrê vînayîş û ganî nê  travma ra bêrê xelaskerdiş." Mîthatî peynîya qiseykerdişê xo de numaraya telefonî ya 0532 175 49 02 da û vat, yê ke Zelîha û Muhammed dîyê eşkenê nê telefonî bigeyrê.