Tepişteya nêweşa 60 serrî nîna veradayîş

  • 09:25 24 Adare 2023
  • NAROJANE
Melek Avcı
 
ENQERE - Tepişteya nêweşe Muhlîse Karaguzel pêwa xeylêk nêweşîyê aye estê, seba raporê ATKyî nîna veradayîş. Kênaya aye Zîlan Karaguzel wina vat: "ATK bîyo sazgehêk sîyasî.  Rewşê lezgînî de dayîka mi benê nêweşxane."
 
Muhlîse Karaguzela 60 serrî zîndanê Cinîyan ê Bunyanê Kayserî de manena û xeylêk nêweşîya ci estê. Muhlîse nêweşa şekir, tansîyonê berzî, astîmî ya. Pêwa nê raporan zî nîna veradayîş. ATK raporê "Eşkena zîndan de bimana" da. Pêwa nêweşîya bîyaye zîndan de krîzê zerrî zî derbaz kerd.
 
Kênaya aye Zîlan Karaguzele derheqê babete de qisey kerd.
 
 15 rey anjiyo bî
 
Zîlane qiseykerdişê xo de wina bale ant serê nêweşîya dayîka xo: "Dayîka mi vernîya ke bêra tepiştiş zî raporê aye yê nêweşî estbî. Şekirê aye zaf berz o. Dayo çim û linganê aye ro. Seba şekirê berzî êdi nêeşkena baş bivîna zî. Nêweşîya aye zerrî esto û 15 reyan anjîyo bî. Hîrê rey zîndan de  krîzê zerrî derbaz kerd. Wexto ke krîz derbaz kena, wedarnenê nêweşxaneyê bajarê Kayserî la wexto ke nêweşxane ra vejenê, reyke bîn krîzê zerrî derbaz kena. Rewşa ci ya weşîye nêbaş a. Pêwa pêro hewldayîşan zî nêverdenê ma şêrê serdayîşê aye."
 
‘ATK bîyo dezgehêk sîyasî’
 
Zîlane bale ant nizdîbîyayîşê ATKyî ser û vat: “ATK raporanê verênan çinî hesibneno. Dayîka mi şî ATKyî, raporê ‘eşkena tepişte bimana’ ame dayîş. Wexto ke krîzê zerrî derbaz kerd ma şîyî nêweşxane. Vatî ke nêweşxane de nîya. Seba ke ma pêvînayîş nêkerî zure kerdî. Ma bi desturê dozgerî dayîka xo dî. Rewşa aye qet baş nêbî. Di gardîyanî vere aye de bî. ATK vera her çîyî raporê eşkena zîndan de bimana da. ATK bîyo dezgehêk sîyasî. Rewşa lezkî de dayîka mi bene nêweşxane. Seba ke derbazê qeydan biba wina kenê. Tu manaya berdişê aye ya nêweşxaneyî çin a. Derman ge-ge dîyeno tepişteyan. Dermanê şekirî bi taybet ganî saetê xo de bêro dayîş."
 
‘Heqê tepişteyan yeno binpaykerdiş’
 
Zîlane da zanayîş ke vera raporê doktoran zîndanan de seba werdê tepişteyanê nêweşan baldarîyêk çin a û wina qedênaye: “Nêweşîya aye ya şekirî esta û her werdî nêeşkena biwera. Birinc, kartol ganî nê çîyan qetî nêwera. Sewbîna werdê ke yenê dayîş zî nînê werdiş. Doktoran lîsteyêk da dayîka mi. Çend rojan goreyê lîsteye werd ame dayîş la dima ra fek ci ra veradayî. No nizdîbîyayîşêk polîtîk o. rewşa tepişteyanê nêweş û binpaykerdişê heqanê înan eybê nê welatî yo. Her qeraro ke seba tepişteyanê sîyasîyan yeno dayîş polîtîk o. Bi surgunkerdişî tepişte û keyeyê înan yenê cezakerdiş. Keyeyê tepişteyan wexto ke şinê pêvînayîş zî xeylê probleman cuyenî. Seba ke ma şêrî zîndanê Bunyanî yê Kayserî ma 5 wesayîtan bedilnenê. Dayîkêk 60 serrî zîndan de xover dana.”