Tara Fatehî: Îran de wextê şorişî yo

  • 11:08 25 Çele 2023
  • NAROJANE
 
Melek Avci
 
MERKEZÊ XEBERAN - Aktîvîsta kurde ya rojhelatê Kurdistanî Tara Fatehîye dîyar kerd ke Îran de heme nasnameyî bi talebê demokrasiye vejîyayî raşteyan û vat: “Wextê hukmatê Îranî yê 43 serran de kaosê ke vejîyayî raşte nêeşkenê bêrî reformekerdiş. Têkşîyayîşê hukmatê Îranî tena seba şarê Îranî nê seba heme dinyaye do baş bibo.”
 
Qetilkerdişê cinîya kurde Jîna Mahsa Emînîye ra dima rojhelatê Kurdistan û Îranî de bi serkêşîya cinîyan serewedarnayîş dest pêkerd û hema zî dewam keno. Aktîvîsta heqanê kurdan ya rojhelatê Kurdistanî Tara Fatehîye derheqê babete de JINNEWSî rê qisey kerd.
 
‘Waştişê şarî zaf zelal ê’
 
Taraye da zanayîş ke şar 4 aşmîyo têkoşîn dano û sere nêroneno û wina dewam kerd: “Hukmat zî bi hawayêk şîdetin hêriş keno. Merdiman qetil keno. Seba kesê ke yenê qetilkerdiş merasim pê yenê û dima ra reyna protesto dest pêkeno. Coka ra ptotestoyî gird benê. Şar tepîya gamêk nêerzeno. Waştişê şarî zaf zelal ê. Wazenê ke rejim şêro û şar ameyoxê xo awan bikero. No waştiş seba her kesî vîyareno. Heme şarê Îranî azadîye wazeno. Bi israr ê. Sloganê ‘Jin jiyan azadî’ ke kurdanê Tirkîya ra ameyo bîyo sîmge.” 
 
'Hemverê Şarê Kurdî de hîna zêde çimsûre bîyî’
 
Taraye dîyar kerd ke Jîna Emînîye her çend ke biba sembol î esasê xo de xoverdayîşê şarê Rojhelatî bi seserran o dewam keno û vat: “No têkoşîn bi desan serrî yo. kurdê Îranî hemverê dîktatorîyan de her tim têkoşîn rayra berdî. Kurdî verê nê rejmî zî dîktatorî yo ke monarşî ra awan bî qebul nêkerdî. Roja ke komara îslamî Îran de ame awankerdiş ra nata kurdî qet rejim qebul nêkerdî û hemverê zext û rejîmî de vindertî. Coka ra zî hewl danî ke kurdan çinî bikerî. Şîdet bi kurdan kerdî. Ma zanê ke no rejim seba her kesî xirab o. La hemverê Şarê Kurdî de hîna zêde çimsûre yo.” 
 
‘Teda serê her kesî de esta’
 
Taraye ard ziwan ke rejîmê Îranî seba her kesî xrab o û wina dwam kerd: “Wexto ke nasnameyê etnik bibî yew no beno xeleka zextan. Eke merdim Îran de cinî biba na teda hîna giran bena. No dîktatorîyêk çimsûr o. No rejim îslamî sey zexta serê komelî şuxulneno. Renge tayî binê tedayî de yî. Nêeşkenê ziwanê xo bişuxulnî û bi ziwanê xo perwerde nêvînenê. Îran de seba ke kurdî musnayî xeylê mamosteyî nika zîndan de yî.” 
 
‘Wextê awankerdişê demokrasiye ameyo’
 
Taraye da zanayîş ke Îran de heme nasname bi talebê demokrasiye vejîyayî raşteyan û wina domnaye: “Na grube hetê çinîkerdişê hukmatî de bi israr a. Kesê ke Îran cuyenî wayîrê eynî tecrubeyan nîyî. La heme cîyayêyî, nasname û rengê tayî tedaya rejîmî ra para xo gênî. Coka ra zî paştîdayîş mîyan de yî.”
 
Reform nîyo waştişê şorişîyo 
 
Taraye bale ant serê dîktatorîya Tirkîya û vat ke Tirkîya esasê dîktatorîye û polîtîkayanê olî ser de verbi corî ra şina. Taraye wina vat: “Goreyê mi ganî hukmatê Tirke şaşîyanê Komara Îslamî ya Îranî ra dersan bigêro. Ez bi şikina ke do Erdogan huqûqêk olî de aver şêro. Wextê hukmatê Îranî yê 43 serran de kaosê ke vejîyayî raşte nêeşkenê bêrî reformekerdiş. Têkşîyayîşê hukmatê Îranî tena seba şarê Îranî nê seba heme dinyaye do baş bibo.”
 
‘Şar do tepîya gamêk nêerzo’
 
Taraye vat ke êdî şar bedelnayîş wazeno û qiseykerdişê xo wina qedênaye: “Şar babeta ke do nêagêrî sîstemê zext û zilmî de bi israr o. Badê şîyayîşê hukmatê Îranî xeylê kar û barî estî. No bi raştî zî şoriş o. Şar bedelnayîş wazeno. Qet nêbo ez eşkena serê nameye Şarê Kurdî de qisey bikera vaja ke înan de agêrayîş çinî yo israr esto. Êdî ma na nokta rewna derbaz kerd. Goreyê mi şar êdî rejimî qebul nêkeno. Şar aştî û demokrasiye wazeno. Do no zilmê dîktatorîye qebul nêkerî.”