‘Nizdîbîyayîşê hemverê qanûnê 6284î restorasyonê serdestîya camêrdî yo’ 2023-03-27 09:03:47     Melek Avci   ANQARA - Femînîste nuştoxe Berîn Sonmeze dîyar kerd ke ver bi weçînayîşî qanûnê 6284î bazarî rê yeno akerdiş û vat ke na game restorasyonê serdestîya camêrdî ya û vat: “Seba ke heqê cuya ma binpay bikerê bazarî kenê. Hemverê nê çîyî de ganî ma têkoşînê xo gird bikerê.”   HUDA PAR û Partîya Yenîden Refahe tewrê AKP-MHPyî bî û senî ke ameyî destkewtişê cinîyan hedef girewtî. Protokolo ke AKPyî reyde ame kerdiş, çapemenîye de ame weşênayîş û dima ra sere de cinî xeylê hetan ra reaksîyonî ameyî mojnayîş.   Femînîste nuştoxe Berîn Sonmeze derheqê babete de ajansê ma JINNEWSî rê qisey kerd.    Berîne da zanayîş ke netîceyê têkoşînê cinîyan de Peymana Stenbolî hetê hukmatî ra ameybî qebulkerdiş û reyna qanûnê hûmara 6284î zî bi netîceyê têkoşînî ame destfînayîş û wina vat: “Pêşnîyazîyê ke cinîyan hadre kerdbî hetê hukmat, kabîne û parlementoyî ra her çend ke cinîyan nêwaştêne tay bedilnayîşî bibê, la ame kerdiş. Heme zî destkewtişê cinîyan bî. AKP 10 serrê peyênan de hêrişê destkewtişê cinîyan kerd. AKP her ke şino muhafazakar beno.”    ‘Serekkomarêk ke  ku soz dano ke do heqê cinîyan xesp bikero, esto’   Berîne dewamê qiseykerdişê xo de nê çîyan ard ziwan ser: “Peymana Stenbolî bi hawayêk teberê qanûnî ame wedaritiş. Serra diyîne ya feshkerdişê peymanî de qanûnê 6284î munaqaşaye rê ame akerdiş. Partîya Yenîden Refahe taleb kerd. Qet şik çin o ke no surprîz bî. Çike verê cû ra partîyêke hemverê cinîyan a. AKP prosesê weçînayîşî de şino muzakereyêk ke şertê înan qebul keno. No merdiman şaş nêkeno. Serekkomarêk ke soz dano ke do heqê cinîyan xesp bikero, esto.”   ‘Seba polîtîkaya xo lazimî bi şîdetî vînenê’   Berîne sewbîna dîyar kerd ke wexto ke merdim ewnîyeno sozê weçînayîşî yê AKPyî vîneno ke derheqê çinîkerdişê xeylê heqanê cinîyan de û munaqaşakerdişê qanûnê 6284 û heme polîtîkayê bînî merdiman şaş nêverdenê. Berîne wina domnaye: “Cinîyê ke AKPyî de ca gênê destur danê peyman û qanûnan. No zî probleman virazeno û şîdet hîna giran keno. Şîdetê hemverê cinîyan her ke şino hîna zêde beno. Îqtîdar seba bîyayîşê xo, seba polîtîkaya xo lazimî bi şîdetî vîneno. Seba ke xo awan bikero şîdet keno. Coka ra zî nizdîbîyayîşê hemverê qanûnê 6284î restorekerdişê serdestîya camêrdî yo. Weçînayîşî ra ver serê heqê cuya cinîyan de bazarîya sîyasî yena kerdiş.”    ‘Ganî têkoşîn bêro dayîş’   Berîne qiseykerdişê xo yê peyênan de wina vat: “Ma seba seyyewbînanîye têkoşîn danê. Ma temsîlkarîya seyyewbînan wazenê. Ma wezîrtîya seyyewbînan û cinîyan wazenê. Ez veng dana cinîyê ke mîyanê îqtîdarî de ca gênê. Ganî ê zî xover bidê û muhîmî bidê qanûnê 6284î. Ganî ê zî hemverê nê xespî de bêveng nêmanê. Ma wazenê ke waştişê ma bêrê qiseykerdiş la çi heyfo ke ê seba binpaykerdişê heqê cuya ma bazarî kenê.”