Mesajê Newroza Stenbolî: Adres Abdullah Ocalan o 2023-03-23 15:00:05   Marta Somek    STENBOL - Endama Koordînasyonê Cinîyan ê Merkezî yê HDKyî Arîfe Çinare derheqê  Newroza Stenbolî ke bi se hezaran kesî hêrsê xo yê hemverê tecrîdî de mojna û vat: "Newroze de ame mojnayîş ke Birêz Ocalanî, çareserîya problemê kurdî û awankerdişê aştî û cuya newe Tirkîyaya."   Newroza emser bi sloganê, "Her ca Newroze her wext azadîye" û "Bi adirê Newroze reyde ver bi azadîye" ame pîrozkerdiş. Raşteyê Newroze de mesajê girîng ame dayîş. Tecrîd, rewşa tepişteyan û xemsarîya dewlete ya hemverê erdlerzî de raşteyê Newroze de ameyî ziwan.   Raşteyê Mîtîngî yê Yenîkapî yê Stenbolî de Newroze bi coşêk pîl ameye pîrozkerdiş. Welatijê ke bi cilê xo yê rengîn tewrê pîrozbayîye bî raşte xemilnayî. Sloganê sey "Hezar silam Serekî rê", “Biciwîyo Serek Apo”, “Bê Serek cuye nêbeno”, “Biciwîyo xoverdayîşê zîndanan”, “Hukmat îstîfa”, “Erdlerz ney sîstem kişeno", “Newroze pîroz bo” û “Bicîwîyo biratiya şaran” raşte de berz bî.   Derheqê pîrozbayîya Newroze ya Stenbolî de Endama Koordînasyonê Cinîyan ê Merkezî ya Kongreya Demokratîke ya Şaran (HDK) Arîfe Çinare ajansê ma rê qisey kerd.   'Tewrbîyayîşê ciwanan girîng bî' Arîfe, dîyar kerd ke Stenbol de tewr zêde ciwanî tewrî pîrozbayî bîyî û vat: "Ma na Newrozê de rengê heme şaran tewr xurt dî. Oyo ke nê erdlerzî de açarna felaketî dewlete bi xo bî. Seba ke 3 rojê destpêkî yê erdlerzî de dewlete uca çinbî, no çî bî sebebê hêrsê heme şarê Tirkîya. No çî mîyanê şaran de bi hêrsêk pîl. Tam na çarçewaya de no hêrs açarya serewedaritişî û raşteyê Newroze xo mojna. Stenbol de atmosferêk şînî estbî ke bi taybetî hetêk de vejîyabi werte û hetê bîn ra zî hêrs û serewedaritişî vejîya werte."   Tecrîd, erdlerz û weçînayîş...   Arîfe, dîyar kerd ke çîyo ke reyna bêtêr vejîya werte tecrîd o û wina vat: "Tecrîdê hemverê Birêz Ocalanî yeno manaya tecrîdkerdişê heme şarê ke Tirkîya ciwîyenê. Şar hêrsê xo yê hemverê tecrîdî raşteyan de ardî ziwan. Reyna babeta girîng a ke raşteyî de ame ziwan weçînayîş bî. Şarê ke Tirkîya de ciwîyenê bi polîtîkayê şerî bi polîtîkayê aştî û têduştî wazenê biciwîyê. Newroze de nê 3 babetî ameyî ziwan. Newroze de hemverê sîstemê serdestî serewedarnayîşêk û xoverdayîşêk estbî."   'Dêsê ke ameyê ronayîş rijîya'   Arîfe, da zanayîş ke pîrozbayîya Newroza serra 2023ine de vejîya werte ke hişmendîyê 100ine ê Komara Tirkîya êdî mîyanê şarî de tu manaya ci çin o û vat: "Bi polîtîkayê înkar, asîmîlasyon û çinhesibnayîşî êdî nêeşkenê sîstemê rayîr ra berê. Dêsê ke hemverê şaran ame ronayîş Newroze de rijnayî. Newroze de ame mojnayîş ke bi Birêz Ocalan do problemêk bêro çareserkerdiş. Serra 2023ine de tewr zêde waştişê cuyêka bi statuyê kurdan ame ziwan."   'Vernîya erdlerzî krîzê ekonomî estbî'   Arîfe, dewam de wina vat: "Rewşêke wina de erdlerz virazîya. Tevgerê kurdî, sosyalîst û çepgir her tim derheqê mekanîzmayê dewlete de fikrê xo ardî ziwan. La dimayê erdlerzî vatişê înan tewr zêde ameyî famkerdiş. Ame vînayîş ke hişmendîyê yewperestî êdî nêeşkeno dewlete bêro rayraberdiş. No çî hetê şarî de ame vînayîş. Rejîmê yewkesî êdî xizmet nêdano komelî. Weçînayîş de heme şarî do bibê yew, hemverê nê hişmendî û sîstemî sere wedarnayî."   'Ma do paştdayîşê xo dewam bikerê'   Arîfe, wina bale ant serê amancê HDK Û HDPyî û vat: "Ma bi nasnameyê cîya reyde xebityenê. Ma seba şarê ke Tirkîya cuyenê, xebatê xo pîl bikerê fikrê cuyêke mîyanê aştîye de aver berê. HDP tîya sîyasetê xo yê demokratîkî anê ziwan. Ma nê Newroze de vîna ke xeylêk nasnameyê cîya û kesimê cîya tewrê pîrozbayîya bî. Seba nê sebebî zî ma do tewr zêde xebatê xo pîl bikerê. Sewbîna ma do seba erdlerzî xebatê xo dewam bikerê û paştdayîşê xo bi mexdûrê erdlerzî reyde dewam bikero."