Dewaya Rojbîn Çetîne siba ya: Her gamek suc ame hesibnayîş 2023-01-23 14:05:13      Zelal Tunç    WAN – Dewaya aktîvîsta TJAye Sevîl Rojbîn Çetîna ke serra 2020î de pê îşkence ameye destbendkerdiş û tepiştiş do siba bêra dîyîş. Avukata aye Ekîn Yetere dîyar kerd ke bîyayîşê dosyayî bi pêroyî binpaykerdişê heqan o û her gamêk Rojbîne suc ameyo dîyîş. Ekîne vengê tewrbîyayîşê roniştişî kerd.   Aktîvîsta Tevgerê Cinîyanê Azadan (TJA) û Endama Heyetê Rayîrberîya Herêmîye ya Partîya Demokratîke ya Şaran (HDP) Sevîl Rojbîn Çetîne 26ê hezîrana 2020î de çarçeweya tehqîqatê Serdozgerîya Komare ya Mêrdînî de Amed de pê kutikî îşkence bi aye ame kerdiş û ameye destbendkerdiş. Roniştişê qerarî yê dewaye do siba bêra dîyîş.    Rojbîne prosesê verê cû yê 4 serran ke tepişteyê mende de teşhîsê kanserê lenfî bi aye ameybî kerdiş. Hucre û zîndan bedene aye ser de tesîr viraşt û sere de kanserê rehîmî aye de vejîya. Kanserê lenfî vera Rojbîne ganî hetê werdê xo de baldar biba la zîndan de bi hawayêk kilo vînî kerd û tena bi dermanan payan ser de ya.    Avukata aye Ekîn Yetere da zanayîş ke roniştişê dewaye 24ê çeleyî de yeno dîyîş û derheqê prosesî de ajansê ma rê qisey kerd.   Xeleka bêhuqûqîyan   Ekîne dîyar kerd ke sebebê destbendkerdişê Rojbîne xebatê ke çarçeweya endamîya heyete rayîrberîya herêmî yê HDPyî de ameybî kerdî yo û Wan de zî xebatê TJAye ke kerda kerdî bahane û wina vat: “Nê tehqîqatî ra hewte de hirê rojan îmze eştêne. Rojbîne problemanê weşîye vera teberê welatî de bî. Ma waştişname dabî. La dozgerî qerarê tepiştişî da. Cok ra zî çarçeweya tehqîqatê Mêrdînî de ameye destbendkerdiş.”    Ceza yena waştiş   Ekîne vat ke Rojbîne 26ê hezîranan serra 2020î de ameye destbendkerdiş û pê kutîkî îşkence bi aye ame kerdiş û bi desan polîsî aye derb kerdî. Ekîne wina dewam kerd: “Dima ra dosyayê aye ya Mehkemaya Cezaya Girane ya Wanî kerdî yew. Heme tehqîqatê derheqê aye kerdî yew. Roniştişê peynî de dozger bi îdayê ‘endamîya rêxistine’ sewîyeya tewr cor de aye rê ceza waşt.”   ‘Bîyayîşê dosyayî binpaykerdiş o’   Ekîne wina domnaye: “Dosya de çîyo ke suc bêro hesibnayîş çin o. ma eşkenê vajî ke bîyayîşê dosyayî binpaykerdiş o. Her gamê ke Rojbîne eşta suc hesibîyayî. Rojbîne sîyasetmedarêk a.”   Seba roniştişî vengdayîş   Ekîne tewr peynî wina vat û qiseykerdişê xo qedênaye: “Rojbîne wextê destbendkerdişî de problemanê cidîyan yê weşîye cuyaya. Bi hawayêk cîdî kilo daya. Rojbîne babeta weşîye de sîyasetmedarêk mutevazî ya. Nêwazena biba rojev. Vana ke tepişteyê ke rewşa înan yê mi ra giranêr a estê. Ganî Rojbîne rewşa aye ya weşîye vera baş bêra ewnîyayîş. Nêweşîya aye bi riskin a. Nê şertan mîyan de nêeşkena tepişte bimana, ganî bêra tehlîyekerdiş. Ma vengê tewrbîyayîşî danê her kesî. Roniştişê dewaye 24ê çeleyî de yo. Ez veng dana heme komeleyanê cinîyan, platform û rêxistinanê cinîyan ke tewrê roniştişî bibê.”