'Qey wijdan û exlaqê şima çin o' 2023-01-22 12:07:43     Sema Çaglak     ŞIRNEX - Serhat Erdogan netîceyê hêrişê çekanê kîmyewîyan de ame qetilkerdiş, dayîka aye Sabrîye Erdogan, reaksîyon mojna û vat: "Do heta key gonî birija. Zerrîya ma pirrî kul û birîn a. Ez venga kurdan kena ke tifaqê xo pê bîyarê. Do tena tifaqbîyayîş serkewtiş bîyaro."   Hêrişê Dewleta Tirke yê bi hemkarîya Partîya Demokrate ya Kurdistanî (PDK) herêmê Zap, Avaşîn û Metînayî de dewam keno. Netîceyê hêrişan de bi desan rey  çekê kimyewî ameyî şuxulnayîş. Endamê HPGyî Serhat Erdogan (Xelef Tolhildan) zî netîceyê hêrişê çekanê kîmyewîyan de Avaşîn de ame qetilkerdiş.   Serhat şarê Cizîra Botanî ra yo û mîyanê keyeyêk welatperwer de pîl beno. Serhat, serra 2015ine de tewrê PKKyî beno. 26ê Êlule 2022ine de zî netîceyê hêrişê çekanê kimyewîyan de dinyaya xo bedelneno. Dayîka Serhatî Sabrîye Erdogan (60), ajansê ma rê qalê lajê xo kerd.   ‘Nêheqî û zulm qebûl nêkerdêne' Sabrîye, dîyar kerd ke ê 30 serrî verê dewa Çamkarayî yê girêdayeyê Cizîrî koçber bîyê û Cizîrî de bi ca bîyê. Sabrîye, dayîka 8 tutan a û Serhat lajê aye yê tewr qij o. Sabrîye, destpêkê qiseykerdişê xo de wina qalê lajê xo kerd: "Serhat tutîya xo ra resnaye bi. Wendiş ra xeylêk hes kerdêne. Xeylêk jîyatî bi. Têkîlîyê ey bi komelî reyde germ û zanaye bi. Zerrîya kesî nêverdayîne. Kesêk sakîn û bi aqil bi. Hema emrê ey qij bi, xebera ey dej û zulmê serê kurdan de estbi. Tim vatêne nêheqî bima kenê û tim kurdan bêçare verdenê. 26ê sibata 2015ine de şi. Ma qet ci ra xebere nêgirewte û xebera ma ci ra çinbî ke şîyo. Heta bi xebera şehîdbîyayîşî ey."   ‘Ma qey wijdan û exlaq çin o...'   Sabrîye, bale ant serê şuxulnayîşê  çekanê kimyewîyan û vat: "Ez her bi hesretê lajê xo cuyaya. Her roja Serhatî pirr derbaz bîne. Bi tu karêk veng reyde eleqedar nêbîne. Tim seba xo resnayîşî hewl dayîne. Şexsîyetêk xeylêk bi pak bi. Lajê mi Avaşîn bi çekanê kîmyewîyan şehît kewt. Gama ke mi xebera ey xeberan de dî, zerrî û kezeba mi veşa. Ez bi dejê ey qehrîyaya. Ganî çekê kîmyewî dinya de serê tu kesêk zî nêro şuxulnayîş. Karê huqûq û wîjdanî nîyo. Şuxulnayîşê nê çekan bêexlaqî yo. Şerê her welatî de çekê kimyewî nêameyê şuxulnayîş. Qedera ma na nîya. Welatêk ke vano ez musulman a, senîn bi zerrîyêka rehet nê çekan şuxulneno. Ma qey wîjdan û exlaq çin o.”   ‘Kurdî ganî bibê tifaq’   Sabrîye, vat do heta key gonî birijîyo û wina qedêna: "Ma nêwazenê êdî gonî birijîyo. Zerrîya ma pirrî kul û birîn a. Ma êdî seba aştîye qîrenê. Tena aştî eşkena zerrîya ma şenik û rehet bikera. Seba şer vindero ganî kurdî bibê tifaq. Êdî bes o, wa kurdî nêrê kiştiş û zerrîya dayîkan nêveşa. Ez venga kurdan kena ke wa bi hişyarî têbigêrê û tifaqê xo pê bîyarê. Tena yewîya ma eşkena serkewtiş bîyara."