Talîbanê vê carê park û bexçe li jinan qedexe kir 

2022-11-10 11:22:18


	 

	 

	NAVENDA NÛÇEYAN - Talîban ku bi polîtîkayên xwe yên dijminatiya li jinê timî di rojevê de ye, vê carê jî park û bexçeyên li paytext Kabûlê li jinan qedexe kir.

	 

	Talîbanê destpêka hefteyê ferman da berpirsyarên park û bexçeyan ku deriyên xwe li jinan bigirin. Heta niha ji bo ku jin û mêr li parkê li hev rast neyê, ji bo jinan saeteke cuda, ji bo mêran jî careke cuda diyar kiribû.

	 

	Berdevkê Wezareta "Teşwîqkirina Dilpakiyê û Pêşîgirtina li Nebaşiyê" Mûhammed Akîf Sadik Mûhacîr ji AFP'ê re axivî û got: "Li gelek deveran pîvan hatin binpêkirin. Jin û mêr tevlî hev bûne, pîvana nixumandinê hatiye binpêkirin. Ji ber vê yekê vê gavê biryareke bi vî rengî hate dayin."

	 

	Piştî şerê 20 salan yekîneyên Emerîkî xwe ji Efganistanê vekişandin û di tebaxa 2021'ê de Talîban bû desthilatdar. Rewşa jinan a li Efganistanê ku nebaş bû, bi Talîbanê re ji aliyê azadiyê ve hîn bêhtir nebaş bû.